Rallý hlýðni (e. rally obedience) er hunda íþrótt sem byggist á hefðbundinni hlýðni (e. obedience). Í rallý framkvæmir teymið, hundur og stjórnandi, mismunandi æfingar í fyrirfram uppsettri braut. Ólíkt hefðbundinni hlýðni, þar sem teymið bíður eftir skipun prófdómara fyrir hverja æfingu, heldur teymið áfram í brautinni sjálft á jöfnum og eðlilegum hraða. Hundurinn er staðsettur við vinstri hlið stjórnandans í brautinni, nema ef annað er tekið fram, í hámark hálfs meters fjarlægð frá honum. Í rallý er brautin saman sett af 10-20 skiltum með mismunandi æfingum. Æfingarnar eru framkvæmdar eins og skiltin í brautinni gefa til kynna um, með hundinn í hælstöðu. Áhersla er lögð á samvinnu hunds og stjórnanda í öllum æfingum og á milli æfinganna. Stjórnanda er leyft að hrósa, tala við, hvetja og nota hvaða munnlegu orð til hvatningar nema annað sé tekið fram í reglum. Stjórnandi má ekki snerta hundinn á meðan farið er í gegnum brautina. Í keppni byrjar teymið með 100 stig og dómari dregur af stig fyrir þær æfingar sem ekki eru nægilega vel framkvæmdar eða teymið gerir villur í brautinni, mismikið er dregið af fyrir mismunandi villur. Matið er heilt yfir ekki eins strangt og í hefðbundinni hlýðni. Keppt er í mismunandi flokkum og eru æfingarnar mismargar og miserfiðar eftir flokkum. Skiltin byggjast að stórum hluta á æfingunum; að setjast, leggjast og standa, sem eru framkvæmdar á mismunandi stöðum, í mismunandi röð og oftast í sambland við aðrar æfingar. Í mörgum æfingum þarf stjórnandinn að fá hundinn til að færa sig fyrir framan sig, aftur fyrir sig, í kringum sig eða yfir á hina hlið sína. Rallý byggir því mikið á samspili og leikni hunds og stjórnanda sem teymis. Rallý er hunda íþrótt sem auðvelt er að byrja að æfa sjálfur heima, inn í stofu eða úti í garði til dæmis, þar sem það þarf ekki endilega mikið pláss til að byrja með. Auðvelt er að byrja að æfa og kenna eina og eina æfingu og komast síðar í röð mismunandi æfinga í braut. Aðeins hefur verið byrjað að æfa rallý hlýðni hér heima en Vinnuhundadeild HRFÍ vinnur að þýðingu reglna fyrir rallý svo vonir standa um að hægt verði að efla og stækka íþróttina innan HRFÍ. Kynningarkvöld verður haldið á vegum Ungmennadeildar HRFÍ ef næg þátttaka næst. Fyrir áhugasama má finna hér að neðan áhugavert efni: Myndband sem sýnir framkvæmd á öllum skiltunum, einu í einu: https://www.youtube.com/watch?v=pIL3pcKEAh0 Myndband sem sýnir hund í rally braut í Danmörku: https://www.youtube.com/watch?v=-JEehK1C49U og https://www.youtube.com/watch?v=cT9g3ry41Ns Fleiri myndbönd er hægt að skoða hér td: https://www.youtube.com/results?search_query=Rally+Lydighed Öll skiltin sem samþykkt eru af NKU og útskýringu á ensku hvernig það er framkvæmt: https://www.dkk.dk/uploads/documents/Aktiviteter/Rally/THE-NORDIC-SIGNS-WITH-DESCRIPTION.pdf?fbclid=IwAR0wnIoAAqktE55aODppbPCuB356u9MtfHpKtan_HQvgTA-I5wrL-x0Gjvo
0 Comments
Valborg Óðinsdóttir er hundasnyrtir með margra ára reynslu. Hún er meðeigandi á hundasnyrtistofunni Dillirófu í Mosfellsbæ. Valborg ræktar og sýnir púðlur með frábærum árangri. Hún hefur alist upp með hundum frá unga aldri. Við fengum að spyrja hana nokkrar spurningar um feldhirðu og hvernig sé að vinna sem hundasnyrtir. Segðu okkur aðeins frá þér og hvað þú ert að gera ? Ég hef verið að klippa síðan 2008. Tók stutt 3 vikna námskeið hérlendis og þá var ekki aftur snúið. Ég hóf þá nám á Ítalíu í 3 mánuði þar sem var farið yfir grunninn í hundasnyrtingu og reytingu. Þetta var mjög krefjandi og skemmtilegt nám. Þegar ég kom síðan heim byrjaði ég að starfa við hundasnyrtingar og hef tekið námskeið í púðluklippingum hjá Anders Rosell. Ég var einnig að stofna loks mína eigin stofu ásamt meðeiganda mínum Önnu Dís Arnarsdóttur, hundasnyrtistofuna Dillirófu sem er staðsett í Mosfellsbæ. Við erum einnig að undirbúa skemmtileg feldnámskeið bæði fyrir byrjendur og lengra komna. Hvenær kviknaði áhuginn á snyrtingum hjá þér og afhverju ákvaðstu að velja þetta starf? Ég hef alltaf verið með brennandi áhuga á hundasportinu ásamt snyrtingum. Hundar hafa verið stór partur af lífinu mínu frá því ég var kornung. Ég ræktaði áður Ameríska cocker spaniel hunda og snyrti þá sjálf. Þegar Stefano Vesigno kom síðan til landsins að halda námskeið þá kviknaði enn meiri áhugi á snyrtingum. Það var þá sem ég sá að mig langaði að halda áfram á þessari braut og skráði mig í námið á Ítalíu. Á Ítalíu var mikið um púðlur sem komu í snyrtingu og þá heillaðist ég gjörsamlega að tegundinni og sérhæfði mig í þeim. Hvernig dílaru við stressaða eða hrædda hunda ? Þegar við tökum við slíkum hundum er nauðsynlegt að halda ró sinni allan tímann. Mikilvægt er að hafa rólegt og yfirvegað umhverfi. Best er fara hægt í hlutina og aldrei að sýna að maður sé sjálfur stressaður eða hræddur þar sem þeir eiga að finna fyrir trausti hjá snyrtinum. Hundurinn á að finna fyrir öryggi og að þetta er ekkert hættulegt. Best er að vera rólegur en þó ákveðinn. Oftast er gott að byrja að gera lítið í fyrstu snyrtingunni og auka það svo með hverri heimsókn. Hvernig kemuru í veg fyrir að vera ekki bitin eða klóruð af hundum? Það er alltaf séns að vera klóraður en til að komast sem mest hjá því þarf að hafa rétt handtök. Varðandi bit þá fer það eftir því hvort um er að ræða mjög hræddan/stressaðan hund eða hvort hundurinn sé hreint og beint grimmur. Ég reyni að komast hjá því að setja múla á hunda en það er stundum nauðsyn. Ef hundurinn er algjörlega brjálaður og hættulegur mér og jafnvel sjálfum sér þá þarf að meta hvenær á að halda áfram eða hætta snyrtingunni. Oftar en ekki er þetta í nösunum á þeim, það er best að sýna þeim enga athygli ef þeir eru að narta í mann þá oftast hætta þeir fljótt. Ég sem betur fer hef ekki lent í mjög slæmu dæmi ennþá, að minnsta kosti ekki það slæmu að ég náði ekki að klára snyrtinguna. Hvað spyrðu fólk að þegar það mætir með hund í snyrtingu? Ég byrja alltaf að spyrja fyrst og fremst um hvað á að gera, hvort eigi að raka eða klippa og hvort um sýninga- eða heimilishund sé að ræða. Tala um síddina, hversu mikið á að taka af. Spyr hvort eigi að halda sídd á eyrum eða skotti. Ég reyni eftir bestu getu að fá sem mestar upplýsingar um hvernig snyrtingin eigi að vera svo eigandinn verði sáttur. Ef manneskjan hefur ekki hugmynd þá ráðlegg ég henni og jafnvel sýni henni myndir af snyrtingum eftir mig af sömu eða svipaðri tegund. Ég spyr einnig um hvort hundurinn sé með einhver ofnæmi og ef hundurinn er mjög gamall þá um hvernig hjartað sé og hvort hann sé á einhverjum lyfjum. Ef fólk krefst þess að láta raka hunda með tvöfaldan feld, þá fer ég yfir hversu skaðlegt það getur verið og afleiðingar. Hver eru grunntólin sem fólk með feldhunda þyrfti að eiga? Ég myndi segja slicker bursta, stálgreiðu og pinnabursta ef þú ert með feldhund í fullri sídd. Gott sprey eftir hvernig feld hundurinn er með og auðvitað gott sjampó og næringu. Ekki má gleyma klóaklippum. Hvernig kemuru í veg fyrir að hundurinn þæfist? Með því að greiða reglulega, ef hundurinn er þurr að þá spreyja vel yfir hann og greiða síðan. Stálgreiðan á að geta farið alveg upp að húðinni og í gegnum hárin án þess að stoppa. Best er að baða reglulega og ef það er rigning að passa að þurrka hann vel þegar hann kemur inn til að hann þorni ekki með sand, greinar eða annan gróður í sér. Best er að leita sér ráða hjá ræktendum eða hundasnyrtum ef fólk lendir í vandræðum með flóka. Flestir eru mjög hjálpsamir og tilbúnir að aðstoða. Hvað finnst þér vera nauðsynlegt að hundasnyrtir búi yfir? Hundasnyrir þarf að hafa þekkingu og kunnáttu til að skila vel af sér hundinum þannig að hann sé snyrtur eins og beðið var um. Einnig er gott að hafa þekkingu á sem flestum hundategundum, ef ekki að afla sér þá þær upplýsingar. Hundasnyrtar þurfa að vera óhræddir, þolinmóðir og hafa góða aðstöðu og tól. Einhver ráð fyrir byrjendur með feldhunda? Fyrst og fremst að ráðfæra sig við ræktandann sinn eða sækja sér upplýsinga hjá ræktendum af sömu tegund. Einnig er gott að ræða við hundasnyrta og fá þar upplýsingar, jafnvel setja upp skipulag ef hundurinn á að fara í snyrtingu reglulega. Talað erum að best sé að fara með feldhunda í fullum feldi í snyrtingu vikulega alveg upp í á 3 vikna fresti, fer eftir hversu duglegur eigandinn er að hugsa um feldinn heima við. Ef hundurinn á ekki hins vegar að vera í fullum feldi er talað um að mæta með hann í snyrtingu á 6-8 vikna fresti. Sóley Halla Möller er gift, tveggja barna móðir sem starfar sem flugfreyja og hundasnyrtir. Sóley á tvær shetland sheepdog mæðgur í dag en hefur verið í hundunum í fjölda ára og átt mismunandi tegundir. Við fengum aðeins að forvitnast um starf og áhuga hennar á snyrtingu hunda. Hversu lengi hefur þú verið í hundunum? Ég hef alltaf verið í kringum hunda en eignaðist minn fyrsta hund þegar ég var 18 ára, Golden Retriever 1987. Hversu lengi hefur þú starfað sem hundasnyrtir og hvernig vaknaði áhuginn á faginu ? Ég hef starfað sem hundasnyrtir í 25 ár. Lærði fyrst í Englandi og hef svo farið á snyrti námskeið hér og þar í evrópu til að bæta við þekkingu á tegundum. það er alltaf hægt að læra. Ég á minningabók síðan ég var 12 àra og þar skrifa ég að ég ætli að verða Flugfreyja og Hundasnyrtir þegar ég verð stór og starfa ég við bæði í dag 😁 en alvöru áhugi minn vaknaði þegar ég eignaðist óvænt Standard Poodle 1994 sem mig langaði að snyrta sjàlf. Hvað skiptir mestu máli í almennri feldumhirðu hunda? Gott fóður, hreyfing og dagleg umhirða skiptir öllu máli , það fer einnig eftir tegund hversu mikla feldumhirðu hver hundur þarf, svo skiptir máli að vera með góða bursta og greiður og góð sjampó. Hvernig komum við í veg fyrir eða minnkum flækjumyndun hjá hundunum okkar? Það er ósköp einfalt, það þarf að vera vakandi varðandi feldhunda, svo no 1 dagleg umhirða og rétt áhöld og kunnàtta. Er mismunandi hvaða sjampó við notum eftir tegundum, hvernig veljum við það ? Já það eru til sjampó fyrir hverja feldgerð fyrir sig og um að gera kynna sér það vel og velja svo hvað hentar. Hvað þarf maður að gera til að verða hundasnyrtir? No 1,2,3 er þolinmæði ef fólk hefur ekki stjórn á skapi sínu þá á það ekkert erindi að vinna sem hundasnyrtir, það krefst mikillar þolimæði að snyrta hunda og fara vel að þeim svo það gangi vel. Eitthvað gott ráð í lokin fyrir unga sýnendur og alla hundaeigendur í tengslum við feldumhirðu. Vera dugleg að afla sér upplýsinga varðandi feldumhirðu hjá þeim sem hafa reynslu og svo er hægt að googla allt í dag nátturulega. Snærún Ynja Hallgrímsdóttir Smith er 16 ára ungur sýnandi og hundaþjálfari. Snærún hefur verið að æfa spora- og hlýðniþjáflun með German shepherd tíkina sína Áru ásamt því að sýna hana. Snærún tók þátt í sporaprófi með Áru í sumar og eru þær báðar í hópi yngstu þátttakenda sem hafa náð prófi í Spori I. Hvenær byrjaðir þú í hundunum? Fékk fyrsta hundinn minn þegar ég var sjö og byrjuðum við að sýna hana en fór í unga sýnendur þegar ég var 11 Hvað finnst þér skemmtilegast við að eiga hunda? Þeir eru bara svo skemmtileg dýr og góður félagsskapur Hvernig hund/hunda áttu? Ég á 5 labradora einn strák og fjórar stelpur og svo einn þýskan fjárhund Hvenær kviknaði áhugi á spora/hlýðni þjálfun? Hef alltaf haft smá áhuga á hlýðni en þegar ég fékk Áru (þýska fjárhundinn) hafði sú sem ég fekk hana hjá verið mjög sterk í hlýðni og spori og hún hvatti mig í að byrja æfa það Ertu búin að taka þátt í keppni í hlýðni og/eða spori? Hef tekið þátt í bæði spori og hlýðni, sporið gekk ágætlega en hlýðnin hefði mátt ganga betur, einnig þjálfaði ég hund í hundafimi og náðum við bronsi þar Hvaða hund ertu að keppa með í spori og/eða hlýðni, hvernig myndirðu lýsa honum? Er að keppa með Áru schefferinn minn, hún er mjög klár og fljót að læra og það er skemmtilegt að vinna með henni. Hún er aðeins 18 mánaða en stendur sig mjög vel Hvað æfið þið oft? Reynum að fara spora a.m.k einusinni í viku en við erum með fasta tíma þar sem við förum einusinni í viku að þjálfa hlýðni svo æfi ég þess á milli heima og í gönguferðum. Allt sem við gerum með hundunum okkar er partur af hlýðniþjálfun. Hvort sem það er að sitja og bíða eftir matnum eða liggja hjá mér á meðan ég er að læra heima Hvað finnst þér mikilvægast í þjálfuninni fyrir spor/hlýðni? Í spori er mikilvægt að gera þetta ekki of oft í einu þar sem þetta tekur mikið á fyrir hundana en fara þá frekar oftar í vikunni, æfa stutt umfram allt að hafa gaman. í hlýðni er mikilvægt að vera þolinmóður, ekki verða pirraður ef hundurinn er ekki að ná árangri hratt, hundar geta fundið á sér ef stjórnandi er pirraður eða stressaður og því er mikilvægt að vera rólegur og taka sinn tíma og æfa jafnt og þétt og stundum þarf að fara til baka og hafa æfinguna léttari þótt hún hafi verið gerð erfiðari seinast. Eins með hlýðnina og sporið, gera stutt og endurtaka. Áttu einhver góð ráð til að hvetja fleiri unga krakka að byrja á þjálfun/halda áfram? Ekki flýta ykkur of mikið þetta tekur allt góðan tíma og þarf að vera þolinmóður með hundinn, ekki bera ykkur saman of mikið við aðra því það eru allir að æfa mis mikið og hundarnir eru líka allir mismunandi Jóhanna Þorbjörg Magnúsdóttir er lögreglumaður, hundaþjálfari og eigandi einangrunarstöðvarinnar Mósels. Hún er mikil dýramanneskja enda uppalin í sveit og fékk sinn fyrsta hund þegar hún var 15 ára. Hundurinn hennar, Morris var heiðraður sem þjónustuhundur ársins hjá HRFÍ 2018 fyrir störf sín sem björgunarhundur. Við fengum að spyrja Jóhönnu út í hundaþjálfun og hundaáhugann. Segðu okkur aðeins frá hver þú ert og hvað þú ert að gera með hundum í dag Ég vinn sem lögreglumaður og hef gert með hléum frá árinu 2007. Hundar hafa alltaf átt hug minn allan en ég fékk samt ekki hund sjálf fyrr en ég var orðin 15 ára ! Fyrir þann tíma hafði ég samt alltaf verið í kringum þá enda alin upp í sveit og var við tamningar og þjálfun á hrossum frá því að ég var barn. Í dag er ég búin að fara tvisvar erlendis í nám. Fyrst til Bandaríkjanna þar sem ég fékk mikla reynslu í þjálfun á vandamálahundum. Síðar fór ég á vegum lögreglunnar og sérhæfði mig í þjálfun hunda til efnaleitar. Í dag er ég eigandi af einangrunarstöðinni Mósel og þjálfa hunda til að finna myglu í húsum. Það er ýmislegt í farvatninu varðandi frekari vinnu í þeirri þjálfun en í dag er ég fyrst og fremst að grunnþjálfa hunda til áframhaldandi vinnu í efnaleit, ásamt því að vera í almennri kennslu í hundaþjálfun. Hvenær vaknaði áhuginn þinn á hundaþjálfun og afhverju ákvaðstu að feta þann veg? Þetta er góð spurning ! Ég hef fengið þessa spurningu áður og á í raun erfitt með að svara henni. Ég held að þetta hafi alltaf verið hluti af minni persónu. Ég er eðlisforvitin um hegðun, hvort heldur sem er dýra eða manna. Ég þrífst í rauninni ekki án þess að vera með hund mér við hlið og hef ekki gert í langan tíma. Göngutúrar án hunds finnst mér fáránleg hugmynd, reiðtúrar án hunds er bara eitthvað óeðlilegt og heimili án hunds er fyrir mér bara stillimynd fyrir húsgagnaljósmyndun..... Ég hef lagt gríðarmikla vinnu og fært miklar fórnir til þess að vera komin á þann stað sem ég er komin í dag. Að vera hundaþjálfari er frábært en vanþakklátt starf veraldlega. En ég myndi ekki vilja skipta því út fyrir neitt. Ég hvet alla sem hafa hæfileikann og áhugann til að skoða vel þann möguleika að velja sér þann farveg að leggja hundaþjálfun fyrir sig ! Hvaða hundur hefur haft mest áhrif á þig? Morris var minn fyrsti vinnuhundur. Hann var minn vinnufélagi sem leitarhundur hjá björgunarsveitinni alla sína tíð og mun aldrei neinn koma í hans stað. Hvernig hann leysti verkefni sem við stóðum frammi fyrir í fjölmörgum útköllum mun ég aldrei, með alla mína reynslu og þekkingu geta útskýrt. Hvenær á hundaþjálfun sér stað? Alltaf, allan daginn, alla daga ársins. Hvernig lærum við að lesa í hundinn? Með innsæi og auðmýkt er hægt að læra það. Reynslan kemur þar á eftir, þarnæst kemur nám. Hvað skiptir mestu máli þegar við þjálfum hunda? Aftur er það auðmýkt og viðhorfið gagnvart þér og öðrum persónulega. Ef við förum inn í þjálfunarstund með neikvæðu viðhorfi með lélegt sjálfstraust náum við aldrei árangri. Hundaþjálfun er til jafns vísindi og list. Aðferðir og rannsóknir breytast í sífellu og þurfum við alltaf að vera meðvituð um að við getum alltaf og munum alltaf læra meira. Mín reynsla er sú að því meira sem ég kann, get og skil því minna finnst mér ég vita um hundaþjálfun ! Hvernig eflum við sjálfstraust hunds almennt? Það er ekki hægt að svara þessari annars góðu spurningu með einföldum hætti. En mikilvægast er að hundurinn viti hvað hann á að gera og má gera – alltaf. Hundar eru mis viðkvæmir fyrir ófyrirsjáanleika og getur það haft alvarleg líkamleg og andleg áhrif ef við erum ekki að gefa skýr og einföld skilaboð. Svo hef ég stundum gefið þau ráð að hafa lífið 80% jákvætt sem felur í sér að setja upp æfingar sem þú veist að hundurinn getur leyst og fær umbun fyrir og 20% sem telja mætti neikvætt eða leiðréttingar. Þá þarf líka að passa að setja upp daglegt líf fyrir hundinn að sú hegðun sem rúmast innan 20% komi ekki upp með því að stjórna áreitinu. Dæmi um þetta er að ef hundur hefur þann leiða ávana að elta ketti, að fara ekki með hann í göngutúr framhjá Kattholti ;) Ertu með ráð fyrir byrjendur? Já – byrja ! Byrja að æfa sig og prófa sig áfram í þjálfun. Erlen Inga er ung og efnileg hundakona sem hefur verið virk í hundaheiminum í mörg ár þrátt fyrir ungan aldur. Erlen keppti meðal annars í fyrsta hlýðniprófi ársins með þeim frábæra árangri að ná 171 stigi af 180 mögulegum í bronsprófi með sheltie tíkina sína Ynju sem er aðeins 2ja ára gömul. Erlen og Ynja lönduðu þar með öðru sætinu. Erlen Inga er hinsvegar eftir okkar bestu vitund yngsti keppandi í hlýðniprófum félagsins til þessa og frábær fyrirmynd ungra hundaþjálfara! Við fengum Erlen til a svara nokkrum spurningum fyrir okkur og vonum að þið hafið gaman af! Hvenær byrjaðir þú í hundunum ? Ég myndi segja að ég hafi verið í hundunum alla mína ævi en mamma mín og pabbi voru byrjuð í þeim áður en ég fæddist. Ég byrjaði að taka meira þátt sjálf utan heimilisins þegar ég varð aðeins eldri, tók td. þátt í Börn og hundar hjá Smáhundadeildinni 2012 þegar ég var á áttunda ári og fór svo í unga sýnendur þegar ég var á tíunda ári. Síðan þá hef ég verið með pásum í ungum sýnendum en sýnt á öllum hundasýningum frá því ég hafði aldur til. Frá því ég var 11 ára hef ég verið að þjálfa hundana á heimilinu af og til með mömmu. Rétt eftir fermingu fékk ég hana Ylfu sem ég hef alið upp sjálf og þjálfað sjálf að mestu leiti. Hvað finnst þér skemmtilegast við það að eiga hunda? Skemmtilegast finnst mér félgsskapurinn af hundinum og líka félagsskapurinn af fólki sem hundalífið býður upp á. Ylfa er alltaf til staðar fyrir mig, hún hjálpar mér að hreyfa mig meira sem er gott fyrir mig en ég er með vefjagigt og á misgóða daga og þá er gott að hafa hana. Hvernig hund/hunda áttu? Ég á sjálf hana Ylfu 2ja ára en hún er Shetland Sheepdog og heitir Islands Sheltie Everdeen, mamma og pabbi eru skráð fyrir henni þangað til ég verð 18 ára en svo eigum við fjölskyldan góðan hóp af labradorum. Hvenær kviknaði áhugi þinn á hlýðni þjálfun? Ég hef af og til verið að hjálpa hjálpa mömmu með labradorana okkar í þjálfun en þegar ég fékk Ylfu þá kviknaði áhuginn meira en Ylfa fótbrotnaði þegar hún var ca. 5 mánaða og var í nokkra mánuði í gipsi. Þórhildur Bjartmarz hundaþjálfari hjálpaði mér og kenndi mér að gera nokkrar æfingar sem hún gat gert í gipsinu sem var alveg frábært og vel þegið. Eftir að hún losnaði úr gipsinu þá æfði ég hana öðru hvoru, ekkkert svo markvist en Þórhildur vakti athygli mína aftur að fara á fullt þegar Covid-samgöngubannið var sett á. Hún hvatti okkur og fleiri áfram á síðu sem hún er með og í kjölfarið skráðum við okkur svo í bronspróf og æfðum vel. Bronsprófið gekk vonum framar, fengum 171 stig af 180 stigum mögulegum og erum ótrúlega glaðar með það. Með hvaða hund kepptiru í brons prófinu og hvernig myndirðu lýsa honum? Ég tók hundinn minn hana Ylfu sem ég hef minnst á hér á undan, hún er vinnuhundur og elskar að æfa og vinna með mér. Hún er mjög fljót að læra æfingarnar svona oftast. Hún er tryggur hundur og húsbóndaholl, hún er orkumikil og elskar að leika. Hún vill líka kúra mikið með mér upp í rúmi. Hvað æfið þið oft saman? Ég reyni að fara með hana í göngutúra daglega þar sem ég tek æfingar með, það fer eftir dagsforminu á okkur báðum hversu margar og miklar æfingar við tökum. Stundum ef ég er mjög verkjuð labbar mamma með hana og tekur þá stundum æfingar líka til að hjálpa okkur. Við leigjum svo sal einu sinni í viku með frænku okkar þar sem við tökum mjög góðar æfingar. Hvað finnst þér mikilvægast að æfa fyrir hlýðni? Best er að læra og æfa vel allar æfingarnar sem þarf að gera í prófinu en það er misjafnt eftir hversu langt maður er kominn í prófunum hvaða æfingar eru og hvernig þær eru útfærðar en auðvitað er best að æfa þannig að þú og hundurinn hafið bæði gaman að því. Stundarðu einhver fleiri sport með hundunum þínum? Ég hef prófað rallý-hlýðni, hundafimi og svo sýni ég hundana mína með mömmu. Mér finnst þetta allt mjög gaman og vonast til að komast á fleiri rallý-hlýðniæfingar og að það verði haldið námskeið sem allra fyrst í hundafimi svo við getum haldið áfram þar. Áttu einhver góð ráð til að hvetja fleiri unga þjálfara áfram? Passaðu þig að hafa gaman fyrir þig og hundinn þinn, ekki gera æfingar ef hvorugt ykkar eruð vel upplögð. Ef þú þarft hjálp, ekki vera feiminn að fá hjálp, það er betra en að gera vitleysu í upphafi. Ég fæ hjálp og finnst það gott. Ég hefði ekki klárað prófið án þessarar hjálpar og er þakklát fyrir hana. Passa líka að æfa oftar í stuttan tíma og hætta þegar vel gengur og allir eru glaðir. Takk fyrir þetta Erlen Inga og okkur hlakkar til að fylgjast með ykkur áfram! |
Archives
February 2021
Categories |